सन्
२०१२ को अन्तिम तिन महिनामा विश्व बजारमा भएको ट्याब्लेट खरीदमा सामसुङले
आफ्ना उत्पादन बढि बेच्न सफल भएको अनुसन्धान संस्था आइडिसीको अध्ययनले
देखाएको छ । तथ्यांक अनुसार यो अवधिमा सामसुङका ट्याब्लेट पिसीले विश्व
ट्याब्लेट बजारमा १५.१ प्रतिशत हिस्सा ओगटेका छन् । उक्त त्रैमासिकमा
सामसुङले आफ्ना ग्यालेक्सी रेञ्जका ७९ लाख थान ट्याब्लेट बेच्न सफल भएको छ ।
जबकी अघिल्लो वर्षको सोही अवधिमा जम्मा २२ लाख थान मात्र बेचेको थियो ।
दक्षिण कोरियाली इलेक्ट्रोनिक्स कम्पनी
सामसुङले विश्वको ट्याब्लेट पर्सनल कम्प्युटरको बजारमा आफ्नो पकड दह्रो
बनाउँदै लगेको छ । ट्याब्लेट बजारमा एप्पलको दबदबा खस्किने क्रममा रहेको र
सामसुङ दरिलो बन्दै गएको तथ्यांकले देखाएको छ ।
यस्तै उक्त अवधिमा एप्पलको हिस्सा ८
प्रतिशतले घटेको देखिएको छ । सन् २०११ को अन्तिम त्रैमासिकमा विश्व
ट्याब्लेट बजारमा एप्पलको हिस्सा ५१.७ प्रतिशत रहेकोमा २०१२ को सोही अवधिमा
४३.६ प्रतिशतमा झरेको छ । यद्यपि एप्पलको आइप्याडप्रति ग्राहकको चाहना भने
अझै पनि उच्च रहेको ठहर आइडिसीको छ ।
विश्व ट्याब्लेट बजारमा विभिन्न कम्पनीबीच
प्रतिस्पर्धा बढ्दै जाँदा ग्राहकको महत्वाकांक्षा पनि बढ्दै गएको र
ग्राहकको बढ्दो रुची र आवश्यकता ट्याब्लेट निर्माताको लागि चुनौति बनिरहेको
विज्ञहरुले बताएका छन् ।
आउँदा दिनमा विश्व बजारमा ग्याजेटको
प्रतिस्पर्धा अझै बढ्ने र उपभोक्ताहरुको हातमा अझै परिस्कृत ग्याजेट पर्ने
निष्कर्ष विज्ञहरुको छ ।
No comments:
Post a Comment